Læknafelagið mælir fólki til at koppseta seg

Læknafelag Føroya mælir nú fólki til at koppseta seg fyri COVID-19 í almennum brævi.

Áheitanin kemur eftir at Jenis av Rana hevur sagt, at hann fyribils ikki fer at koppseta seg.

– Koppsetingarnar fyri COVID-19 eru eitt týdningarmikið vápn móti koronufarsóttini, sigur Læknafelag Føroya.

Felagið mælir tí Føroya fólki til at lata seg koppseta fyri COVID-19, um tey tola at verða koppsett, stendur í skrivinum.

Tað kann ikki takast fyri givið, at vit ikki aftur verða rakt, og tí eiga vit at verja okkum sum best, sigur Læknafelag Føroya.

Nú hava tilsamans 19.153 fólk í Føroyum fingið fyrra prikið, og 7.824 hava fingið tað seinna prikið.