Børn deyð í amerikanskum dronuálopi

Tíggju sivilfólk, teirra millum seks børn, lótu lív, tá ein amerikansk drona skeyt eftir einum bili í afganska høvuðsstaðnum Kabul í gjár.

Umboð fyri amerikanska hervaldið siga sambært altjóða miðlum, at ætlanin var at skjóta eftir einum manni í bili, sum hevði tilknýti til afghansku deildina hjá yvirgangsbólkinum IS, men ein annar bilur og eini hús fingu stóran skaða í álopinum.

Eftir ætlan skuldi dronuálopið raka yvirgangsmannin við spreingievnum í bilinum, og harvið forða fyri einum yvirgangsálopi.

Annar bilur eisini raktur

Men BBC skrivar, at ein annar bilur varð eisini raktur, tá bilførarin skuldi parkera hann uttan fyri heimið hjá teimum tíggju fólkunum, sum øll vóru í familju.

- Vit eru sannførd um, at vit raktu ætlaða málið, tí tað vóru tvær spreingingar, sigur ein talsmaður fyri amerikanska hervaldið.

Seinna spreingingin bendir á, at ein munandi nøgd av spreingievni var í bilinum, sigur hann, og leggur aftrat, at tey eru sera hørm um øll ósek lív, sum vera mist.

Hervaldið sigur seg verða farið at kanna, hvat hendi undir dronuálopinum.