Guterres ávarar Kina og USA

ST-aðalskrivarin, Antonio Guterres, ávarar nú Kina og USA um halda seg frá einum nýggjum køldum kríggi.

Guterres sigur við AP tíðindastovuna, at Kina og USA mugu bøta um tey púra óvirknu viðurskiftini landanna millum, áðrenn tey fara at ávirka viðurskiftini millum onnur lond, tá Kina og USA hava so stóra ávirkan.

Heimins lond hittast í New York í dag á ST-aðalfundi fyri fyrstu ferð í tvey ár, eftir at fundurin í fjør var av ongum vegna koronafarsóttina.

Guterres sigur við AP, at Kina og USA, sum eru størstu búskapirnir í heiminum, mugu samstarva um eitt nú veðurlagsbroytingarnar, men tíverri eru tað einans samanbrestir og ósemjur, sigur hann.

- Vit hava tørv á, at viðurskiftini millum hesi londini gerast betri. Tað er av alstórum týdningi fyri nógv stórmál, tí tey kunnu ikki loysast, um USA og Kina ikki kunnu semjast, sigur Guterres við AP.