Kanna nú, um talan var um vanlukku

Svenska løgreglan kannar, um talan yvirhøvur var um eina vanlukku, tá ið bilurin við svenska Muhammed-teknaranum, Lars Vilks, koyrdi ígjøgnum bilverjuna og kom út í mótkoyrandi vegbreyt, har hann stoytti saman við ein lastbil sunnukvøldið.

Í bilinum sótu Lars Vilks og tvey trygdarløgreglufólk, og tey lótu øll lív.

Svenski teknarin er kendur fyri at hava teknað høvdið á islamska profetinum, Muhammed, á ein deyðan hund.

75 ára gamli Lars Vilks hevði politiverju, tí hann varð hóttur eftir lívinum eftir at hava teknað profetin.

Í tíðindaskrivi frá svensku løgregluni í gjárkvøldið, verður sagt, at høvuðsákærin, Kajsa Sundgren, hevur ábyrgdina av at kanna tann partin, ið snýr seg um starvsfólk í løgregluni.

Væl brynjaður

- Nú skal kannast, um nakað løgreglufólk hevur framt eitt brotsverk í sambandi við vanlukkuna, og um onnur kunnu hava elvt til hana, stendur í tíðindaskrivinum. 

Bilurin hjá Vilks hevði brynjaðar rútar, og vigaði tí 4,5 tons.

Svensk løgregla - Mynd: RitzauScanpix

Svenska løgreglan og Skaðakanningarnevndin á tíðindafundi í gjár um ferðsluvanlukkuna. (Mynd: RitzauScanpix)

-  At bilurin er so tungur, kann verða orsøkin til, at hann kláraði at koyra ígjøgnum bilverjuna, segði Stefan Sintéus frá Skaðakanningarnevndini á tíðindafundi í gjár.

Ein bilur við løgreglufólkum fylgdi bilinum hjá Vilks, men onkurvegna var hesin bilurin so mikið langt frá Vilks, tá ið vanlukkan hendi, at løgreglufólkini í tí bilinum sóu ikki, hvat hendi.

Førarin á lastbilinum slapp frá vanlukkuni við lívinum, men hann hevur fingið skaða. Bilførarin verður nú avhoyrdur, skrivar danska TV2.

Lars Vilks og ferðsluvanlukka - Mynd: RitzauScanpix