Holland hóttir við laksakríggi

Í Hollandi ætla myndugleikarnir at steðga innflutningi av laksi úr Noreg, Føroyum og Íslandi, fyri at raka londini so meint sum gjørligt, afturfyri at londini ikki fiska uppsjóvarfisk burðardygt, skrivar blaðið, De Telegraaf.

Orðaskifti hevur verið í tjóðartinginum í Amsterdam, og har vóru tað serliga høgraliberali stjórnarflokkurin, VVD og Kristiligi Fólkaflokkurin, CDA, sum vórðu samdir um, at Noreg, Føroyar og Ísland seta sær alt ov høgar kvotur av uppsjóvarfiski, serliga av makreli.

Hollendski fiskimálaráðharrin, Carola Schouten, sigur við blaðið, at hon fer at umrøða tiltøk ímóti Noreg, Føroyum og Íslandi saman við øðrum fiskivinnutjóðum í ES.

Carola Schouten heldur tað vera álvarsamt at Noreg, Føroyar og Ísland áseta sær sína egnu kvotur av uppsjóvarfiski.

Boykott

Hollendski fiskimálaráðharrin sigur seg ætla at kanna, hvønn týdning slík tiltøk fara at hava fyri hollendsku góðskingarvirkini, sum geva nógv arbeiði.

Hollendsku virkini keypa nógvan laks úr Noreg, sum verður góðskaður í Hollandi, higartil í ár er talan um næstan 63.000 tons av laksi skrivar I-laks.

Hvørki føroyska vinnan ella myndugleikarnir hava hoyrt nakað um hollendsk tiltøk.