Navalnyj fær Sakharov-virðislønina

Aleksej Navalnyj, russiski andstøðuleiðarin, sum situr í fongsli, hevur fingið Sakharov-virðislønina frá Evropatinginum. 

Tað skrivar størsti bólkurin í Evropa tinginum, EPP, á Twitter.

Aleksej Navalnyj hevur funnist hvassliga at forsetanum í Russlandi, Vladimir Putin. Navalnyj hevur síðani í januar sitið fongslaður, eftir at hann kom aftur til Russlands úr Týsklandi.

Frammanundan var hann í viðgerð fyri eitt eiturálop, sum hann heldur, Kreml framdi. Russiski forsetin hevur tó víst hesum aftur.

Uppkallað eftir Sakharov

Sakharov-virðislønin er uppkallað eftir russiska alisfrøðinginum  og politiska andstøðinginum, sum eisini fekk Nobel-heiðurslønina, Andrej Sakharov, sum ofta gjørdi vart við seg í Sovjetsamveldinum.

Síðani 1988 er heiðurslønin latin á hvørjum ári til tjóðarting ella til fólk og felagskapir, sum stríðast fyri mannarættindum og grundleggjandi frælsisrættindum. Umframt heiðurin, fær Navalnyj 50.000 evrur, sum svara til 372.000 krónur. 

Í fjør fekk andstøðurørslan í Hvítarusslandi Sakharov-virðislønina.