Fíggjarnevndin vil lata stuðul til innkomuvegin

Hóast ivi er sáddur um nýggja ringvegin í Havn, innkomuvegin, er Fíggjarnevndin hjá løgtinginum samd um, at landið skal lata 110 mió. kr. í stuðli til vegin.

Ivin er um, antin vegurin skal verða landsvegur við fáum íbindingum ella kommunalur vegur við íbindingum til býarpartar.

Landsverk sigur, at landið eigur at vera vegarmyndugleiki,  Tórshavnar kommuna vil hava vegarmyndugleikan.

Vegurin er mettur at kosta 288 milliónir, tað er tað, sum er eftir at gera.

Hava brúkt 35 mió. kr.

Higartil hevur landið brúkt 35 milliónir, og partafelagið P/F Eystur- og Sandoyartunlar skal brúka upp í 30 mió.kr. til vegin.

Hesar milliónirnar eru ikki við í teimum 288 milliónunum, so vegurin er mettur at kosta 355 mió. kr.

Landsstýrið hevur við at tinglýsa avtaluna við Tórshavnar kommunu um vegin til 1.januar 2046 tryggjað sær, at fáar ferðsluforðingar verða, so hámarksferðin kann haldast.