Mærsk forvinnur pening sum ongantíð

Tað gongur strúkandi hjá danska felagnum, Mærsk, sum forvinnur so nógvar pengar sum ongantíð fyrr.

Í morgun almannakunngjørdi felagið úrslitið fyri triðja fjórðingsár, og tað vísir ein vinning uppá 35 milliardir kr., sum er fimm ferðir meir enn í fjør. Og tað er eisini tað mesta, sum felagið hevur tjent í einum fjórðingsári, skrivar Ritzau.

Metstóra avlopið stavar fyrst og fremst frá flutningi av bingjum á heimshøvunum, sum eisini er størsta virksemið hjá Mærsk.

Hava tjent 76 mia. kr. í ár

Fleiri ferðir seinasta árið hevur órógv verið í flutninginum av bingjum, og tað hevur fingið prísirnar at hækka munandi.

Higartil í ár hevur Mærsk tjent 76,4 milliardir kr.

Í fjør var yvirskotið hjá Mærsk 18,6 milliardir kr.