Etiopia sett í undantaksstøðu

Etiopia er nú í undantaksstøðu.

Tað boðar stjórnin í landinum frá.

BBC skrivar, at boðini koma fáar dagar eftir, at uppreistrarherurin,TPLF, segði, at teir høvdu tikið tveir býir umleið 400 kilometrar frá høvuðsstaðnum, Addis Abeba.

Stjórnin vísir hesum aftur og sigur, at hetta er propaganda. Í næstan eitt ár hevur stjórnin verið í kríggi við TPLF, sum serliga er í Tigray-landspartinum. 

Reuters skrivar, at fyri tveimum døgum síðani mælti stjórnarleiðarin í landinum, Abiy Ahmed, íbúgvunum at nýta vápn fyri at stríðast móti TPLF. Uppreistrarherurin hevur síðstu dagarnar sagt, at nú herja teir á í staðin fyri at verja. 
 
Bæði Reuters og BBC skriva, at myndugleikarnir í Addis Abeba hava biðið íbúgvararnar um at skráseta tey skotvápn, tey hava, og at fyrireika seg at verja sítt grannalag.