Heilsutrygd tapti sakarmál um heilsutrygdargjald

Heilsutrygd skal gjalda tveimum sjómonnum 20.180 krónur hvør í sakarkostnaði.

Heilsutrygd stevndi monnunum, sum sigldu við norskum skipum, við kravi um, at teir viðurkendu, at teir skulu gjalda heilsutrygdargjald í Føroyum.

Men Føroya rættur frídømdi menninar.

Málið hevur verið umrøtt í nógv ár, tí sjómenn, sum sigla í øðrum londum, vilja sleppa undan at rinda tvey heilsutrygdargjøld.

Kærunevndin hevur sagt, at menn, sum sigla í Noregi og rinda til Folketrygd, ikki eisini eiga at rinda til Heilsutrygd í Føroyum.

Heilsutrygd avgjørdi longu á heysti í 2019 at fara í rættin við málinum.