18 filmsverkætlanir býta 1,3 milliónir kr.

18 føroyskar filmsverkætlanir fáa nú  eina millión og 340.000 kr. í stuðli frá Uttanríkis- og mentamálaráðnum. 

Stuðul verður latin til umsóknir um film í ársins seinna umfari.

20 umsóknir komu inn, og søkt var um tilsamans 1,9 mió. kr. Stuðulin fevnir um eitt nú hugskotsmenning, framleiðslu og útbreiðslu. Talan er um bæði dokumentarfilmar, stuttfilmar og spælifilmar.

Jón Hammer fingið mest

Tvær verkætlanir hjá Jón Hammer hava fingið mest í stuðli. Onnur verkætlanin eitur Kykmyndir, sum hevur fingið 200.000 krónur, og hin er Trom, sum hevur fingið 172.000 krónur. Sostatt hevur Jón Hammer fingið á leið ein triðing av øllum stuðlinum.

Av nýggjum verkætlanum kann nevnast, at Jonas í Dali Wagner hevur fingið 150.000 kr. til Tann óveruliga verðin hjá Aldu, ið er ein teknirøð til børn eftir unga leikstjóran, Tóka Jansson. Røðin viðger á skemtiligan hátt ymisk evni í gerandisdegnum, sum vaksin og børn kenna seg aftur í.

Grindráp úr ymsum sjónarhornum

Ein nýggj føroysk-pólsk framleiðsla hevur fingið 150.000 kr. Hon snýr seg um grindadráp, sum verður lýst úr ymsum sjónarhornum. Talan er um heimildarfilmin To Slay the Grind eftir Symphor Film v/Franklin Henriksen. Filmurin viðger nútíðar føroyingin, har menniskja, siðvenja og náttúra eru í miðdeplinum.

Jóna Kristin Thomsen hevur fingið 37.000 kr. í stuðli til eina røð av stuttfilmum, ið lýsa kreativar mannagongdir innan trý ymisk skapandi øki: veving, málningalist og leiklist. Endamálið við filmunum er at fremja fatanina av, hvat ein kreativ mannagongd er og fáa fram tankar og evni hjá dugnaligum føroyskum listafólkum og listhandverkarum.

Samlaða filmsjáttanin í 2021 er 2,9 mió. kr. Næsta stuðulsumfar verður lýst í desembur við freist 1. februar 2022.

Hesi hava fingið stuðul