Biden ávarar Putin

Joe Biden, forseti, segði, at hann ætlar at gera tað "sera, sera torført" fyri Russland at gera innrás í grannalandið.

Samstundis vilja amerikanskir miðlar vera við, at embætisfólk í fregnartænastuni óttast innrás í Ukraina tíðliga í 2022.

Sambært Ukraina hevur Russland vaksið um hermegina beint við markið, millum annað við umleið 94.000 hermonnum.

Eftir ætlan skulu Putin, forseti í Russlandi, og Biden, forseti í USA, tosa saman í vikuni. Talan verður um eina videouppringing. Biden sigur, at hann fer at hava eitt langt orðaskifti við Vladimir Putin, og ávarar um, at hann fer ikki at góðtaka nakrar "reyðar linjur".

Amerikanski forsetin vildi tó ikki siga, hvat ávíst USA fer at gera fyri at steðga Russlandi. Men bæði amerikonsk og ukrainsk embætisfólk siga, at álvarsom revsitiltøk móti Russlandi eru uppi at venda.

Oleksiy Reznikov, sum er verjumálaráðharri í Ukraina, sigur, at tað er mest sannlíkt, at Russland fer at gera innrás síðst í januar komandi ár. 

Bretski herovastin, generalur Sir Nick Carter, hevur eisini tosað um støðuna við Ukrainska markið í vikuni.

- Vit mugu vera á varðhaldi, um møguligar samanbrestingar í økinum. Eg vóni staðiliga, at tað ikki verður nakað kríggj við Russland, men Nato noyðist at standa klárt, um tað skuldi hent, segði bretski herovastin.

Tað skrivar BBC.