Olaf Scholz er nýggjur týskur kanslari

Týsku sosialdemokratarnir, SPD, atkvøddu leygardagin fyri einari sokallaðari reyðari-gulari-grønari samgongu, eisini nevnd ferðsluljós-samgongan. Í samgonguni eru sosialdemokratarnir, FDP og tey grønu.

Hetta er fyrstu ferð, at flokkarnir gera eina samgongu, sum eftir øllum at døma verður stjórnað av sosialdemokratinum, Olaf Scholz, sum væntandi tekur yvir fyri Angelu Merkel mikudagin í komandi viku. 

63 ára gamli Olaf Scholz boðaði í síðstu viku frá, at flokkur hansara fer í samstarv við libralistiska FDP flokkin og umhvørvisflokkin Tey grønu. 

- Hetta er ein serlig kensla. Eg minnist enn floksfundin í mai, tá ið vit øll sótu saman talgilt, orsakað av koronastøðuni, men vit tordu at herja á og byrja hetta valstríðið, segði Olaf Scholz á einum veljarafundi í gjár.

Undir valstríðnum hevur Schols ført seg fram sum tann, ið er best egnaður at taka yvir, eftir Angelu Merkel, og halda politisku kósina, ið hon hevur sett.

Scholz hevur gjøgnum tíðina sum fíggjarmálaráðharri og arbeiðsmálaráðharri verið sæddur sum ein nærlagdur og framsøkin politikkari, sum leggur seg upp at teimum meiri konservativu linjunum, tá ið tað kemur til fíggjarpolitikk. Hetta hevur havt við sær ávísar ósemjur innanhýsis í flokkinum.

Schols hevur seinastu vikurnar verið við Angelu Merkel á eitt nú G20 topfundi í Rom í oktobur, har hann millum annað var við til ein millumtjóða fund við forsetan í USA, Joe Biden.

Eisini hevur Scholz verið sjónligur til samráðingar og tíðindafundir, tá ið handfaringin av koronu-farsóttini skuldi almannakunngerast.

Angela Merkel stuðlar Olafi Scholz og sigur, at við honum sum kanslara, hevði hon sovið trygt.