"Closed for maintenance" aftur í 2022

Tiltakið ”Closed for maintenance - Open for voluntourism” verður aftur á skránni í mai 2022.

Tiltakið er eitt gott høvi hjá kommunum, hagapørtum og øðrum at fremja neyðugar ábøtur og at fyrireika økini at taka ímóti ferðafólkum, so viðurskiftini eru so væl skipað sum til ber, skrivar Visit Faroe Islands í tíðindaskrivi.

Øll øki í landinum fáa javnbjóðis møguleika at luttaka í átakinum. Hetta verður lagt til rættis á tann hátt, at kommunur og kunningarstovur skulu senda inn uppskot til egnar verkætlanir í samband við “Closed for maintenance” í 2022.

Eins og undanfarin ár er pláss fyri áleið 10 ymiskum verkætlanum kring landið, og Visit Faroe Islands bjóða 100 sjálvbodnum útlendingum at luttaka. Umframt allar fyriskiparar, arbeiðsformenn o.a., fáa 40 sjálvbodnir føroyingar eisini høvið at luttaka í verkætlanunum, soleiðis at øll arbeiðslið vera væl umboðaði av bæði føroyingum og útlendingum.

Treytirnar fyri luttøku eru, at kommunan ella kunningarstovan fyllir út eitt umsóknarskjal. Tess betri verkætlanin er umhugsað og lýst, tess betri møguleika hevur umsøkjarin at verða partur av teimum 10 verkætlanum.

Freistin at lata inn uppskot til verkætlanir er 21. januar 2022.