12,3 mió. kr. í ómaksgjøldum í 2020

Johan Dahl spurdi millum annað um, hvussu stórar upphæddir vórðu kravdar inn í ómaksgjøldum í 2020, býtt upp á stovnar og slag av ómaksgjøldum, til dømis tænastugjøld, rykkjaragjøld og avgreiðslugjøld.

Jørgen Niclasen vísir í svarinum á, at í roknskapinum hjá landinum verða ómaksgjøld ikki altíð eintýðugt eyðmerkt og bókað á standardroknskaparkonto fyri áminningargjøld, rykkjaragjøld, avgreiðslugjøld og annað.

Jørgen Niclasen

Tí ber ikki til at upplýsa heilt neyvt samlaðu inntøkuna frá ómaksgjøldum.

Til spurningin, hvat endamálið við ómaksgjøldum hjá landinum er, svarar Jørgen Niclasen, at tey ómaksgjøld, sum sipað verður til í spurninginum, t.e. tænastugjøld, rykkjaragjøld, avgreiðslugjøld o.a., hava til endamáls at gjalda fyri kostnaðin, ella ein part av kostnaðinum, av at fyrisita tænastuna.

Endamálið er sostatt, at tann, sum brúkar ávísa tænastu, rindar fyri ómakin, heldur enn at tænastan verður fíggjað og goldin gjøgnum skattin.