Tað skal vera greiðari at kæra og viðgera spurningar um javnstøðu

Sambært javnstøðulógini, sum er frá 1994, so skal landsstýrið áseta nærri reglur um kærumálsviðgerð hjá Javnstøðunevndini. 

Hesar reglur eru ongantíð gjørdar.

Men nú eru tær á gattini - 28 ár seinni. 

Eitt uppskot er gjørt um kunngerð, og tað er sent til hoyringar.

Í fastar karmar

Endamálið við kunngerðini er at leggja kæruviðgerðina hjá Javnstøðunevndini í fastar karmar, lætta um arbeiðið hjá Javnstøðunevndini og gera rættartrygdina hjá kærarum og kærdum betri, sigur Almannamálaráðið.

Javnstøðunevndin skal sum kærumyndugleiki vera óheft politiskt.

Tí heldur Almannamálaráðið, at málsviðgerðarreglur hjá nevndini eiga at vera í kunngerð og ikki í rundskrivi ella øðrum tænastuboðum.