Snarfundur í ST um Ukraina

Tey 193 limalondini í ST eru kallað saman til fundar í dag at umrøða rusiska álopið á Ukraina.

Tað hava tey 15 londini í trygdarráðnum gjørt av, og Russland hevði ikki møguleikar at forða fyri avgerðini, skrivar Reuters.

Avgerðin var samtykt við 11 atkvøðum fyri, Russland atkvøddi ímóti, og Kina, India og Sameindu Arabisku Emiratini atkvøddu ikki.

- Limalondini í ST hava kveistrað russisku diplomatarnar av borðinum, og Russland er avbyrgt, segði bretski ST sendiharrin, Barbara Woodward, eftir atkvøðugreiðsluna. Og hon legði aftrat:

- Russland kann ikki forða heiminum at standa saman um at finnast at russisku innrásini í Ukraina.

Fríggjadagin nýtti Russland sýtingarrættin, tá ST ætlaði at fáa Russland at viðurkenna, at tað var skeivt at gera innrás í Ukraina.

Fundurin í dag, sum er ein snarfundur, er tann fyrsti síðani í 1982, tá ST kom saman í skundi at umrøða støðuna í hersettu arabisku økjunum og støðuna við Golanherðunum, sum Ísrael hevði lagt undir seg.