Finski ríkisdagurin skal viðgera uppskot um NATO-limaskap

Finski ríkisdagurin skal nú taka støðu til, um Finnland skal søkja um limaskap í NATO.

Eitt átak byrjaði 21. februar at fáa neyðugu undirskriftirnar, so uppskotið kundi koma fyri ríkisdagin.

Og tað tók ikki meira enn eina viku at fáa tær 50.000 undirskriftirnar, sum eru neyðugar fyri at fáa eitt uppskot fyri ríkisdagin.

Finnlendingurin, Matti Karppa, sum tók stig til at savna undirskriftir, fer at lata ríkisdegnum allar undirskriftirnar.

Uppskotið vísir á, at spenningurin í Eystrasalti økist, og at tíðin er komin, at Finnland skipar sína egnu verju.

Enn er ikki greitt, nær ríkisdagurin fer at umrøða uppskotið, sum vanlig fólk leggja fram.