Verjumálaráðharrin vil hava hermenn kannaðar fyri testosteron

Amerikanski verjumálaráðharrin, Pete Hegseth, sigur, at nú verður krav sett um, at allir amerikanskir hermenn, eldri enn 30 ár, skulu kannast fyri testosteron eina ferð um árið.

Verjumálaráðharrin brúkar kynsneutralu hugtøkini "warrior" og "war fighter", og nevnir einki um kvinnur í hesum sambandi.

Hegseth sigur, at hermenninir gera sjálvir av, um teir vilja í viðgerð.

Teir, sum eru yngri enn 30 ár, kunnu vera kannaðir, um teir vilja. 

Kanningin verður partur av árligu heilsukanningini.

Minkar við aldrinum 

Hegseth leggur aftrat, at viðurkend vísindi siga, at testosteron ofta av natúrligum ávum minkar við aldrinum. 

- Tað snýr seg ikki um tilgjørt at økja avrikið. Tað snýr seg um at endurreisa og optimera tínar natúrligu førleikar, at liva leingi og at tryggja, at tú hevur lívfrøðiliga grundarlagið, sum krevst í bardaga, sigur ráðharrin.

AFP-tíðindastovan hevur biðið Pentagon um viðmerking, men boðini haðani eru: - Vit hava einki at leggja aftrat sjónbandabrotinum hjá ráðharranum í løtuni.

Avgerðin hjá Hegseth kemur, eftir at fleiri í stjórnini hjá Donald Trump, forseta, eitt nú heilsu- og almannamálaráðharrin, Robert F. Kennedy, yngri, hava sagt, at menn skulu hava lættari atgongd til testosteronviðgerð