Trump: Valskipanin viðkvom fyri álopum og uppílegging

- Amerikanska valskipanin er 'skelkandi viðkvom' fyri álopum frá teldusníkum og útlendskari uppílegging.

Tað segði amerikanski forsetin, Donald Trump, í røðu til amerikonsku tjóðina í nátt okkara tíð, nú fýra mánaðir eru til miðvalið verður í november.

Trump skuldsetti Kina fyri av órøttum at hava útvegað sær atgongd til amerikanskar valdátur.

- Í fleiri ár - tað byrjaði longu undir valstríðnum í 2022 - gjørdi Kina tað, sum hildið verður er størsta brotið á valdátur í søguni, segði Trump.

Sambært forsetanum, hevði hetta við sær, at Kina ólógliga útvegaði sær atgongd til 220 milliónir veljaraskráir.

Veljarar við ongum ríkisborgararætti

Trump segði, at Kina royndi at ávirka amerikanska valið til skaða fyri republikanarar, og at Kina fekk atgongd til ómetaliga nógvar upplýsingar um amerikanskar veljarar.

Trump segði, at elektroniskar atkvøðuskipanir kunnu manipulerast talgilt. Hann vísti millum annað til fregnartænastuupplýsingar um Venesuela.

Trump segði, at umleið 278.000 fólk við ongum amerikonskum ríkisborgararætti eru skrásett sum veljarar í stríð við lógina.

Fregnartænastumetingar og óheftar kanningar hava tó mótprógvað hesi uppáhald, skrivar Reuters.

Men óheftar kanningar hava víst, sambært Reuters, at atkvøður frá ikki-ríkisborgarum eru sjáldsama fáar.