Russland vil hava Ukraina at verða uttanveltað

Russland vil røkka máli sínum um, at Ukraina skal vera uttanveltað, og tað skal gerast við samrøðum.

Tað sigur talskvinnan fyri russiska uttanríkisráðið, Maria Zakharova, við Reuters.

Russland gjørdi innrás í Ukraina fyri 14 døgum síðani. 

Humaniteru avleiðingarnar og líðingarnar orsakað av krígnum hava verið øgiligar. 

Flýggja frá húsi og heimi

Síðani innrásina eru meira enn tvær milliónir úkrainar noyddir at rýma frá húsi og úr landinum, og uppaftur fleiri flýggja inni í landinum.

Sambært ukrainskum myndugleikum hava higartil í minsta lagi 2.000 sivil latið lív í russiskum álopum. 

Óheftir stovnar hava ikki váttað talið, men ST váttar, at higartil eru 470 sivilfólk dripin. ST sigur, at talið helst er størri.

Flóttafólk úr Ukraina - Mynd: Ritzau Scanpix

(Mynd: Ritzau Scanpix)

Ætla ikki at fella russisku stjórnina

Zakharova sigur, at málið hjá Russlandi er ikki at fella ukrainsku stjórnina. 

Hon sigur, at Russland vónar at gera størri framstig, tá ið næstu samrøðurnar verða millum Russland og Ukraina.

Undan krígnum í Ukraina, tá ið lond í Vesturheiminum ávaraðu um, at Russland fór at gera innrás, vísti Russland hesum ætlanum aftur.