81 menn eru avrættaðir um vikuskiftið

Saudi Arabia hevur um vikuskiftið avrættað 81 menn, harímillum sjey menn úr Jemen og ein úr Sýria. Menninir vóru ákærdir fyri eitt nú yvirgang og frávíkjandi sannføringar, sum sagt verður.

Hetta skrivar almenna saudiska tíðindastovan SPA sambært The Guardian.

Talan er um eina stóra hækking í talinum av avrættingum, tí alt árið í fjør vórðu 67 avrættingar framdar í Saudi Arabia, og í 2020 vóru tær 27 í tali.

"Hesir persónarnir vórðu dømdir fyri ymisk brotsverk, millum annað fyri at myrða ósekar menn, kvinnur og børn," endurgevur SPA saudiska innanríkisráðið fyri at siga.

Saudi Arabia hevur í nógv ár fingið átalur frá altjóða samfelagnum fyri at fara lætt um mannarættindi, men saudisku myndugleikarnir afturvísa atfinningunum. Sagt verður, at teir ákærdu, sum vórðu avrættaðir um vikuskiftið, allir fingu rætt til ein sakførara, og at teirra borgararættindi vóru tryggjað undir allari rættargongdini.