USA ávarar Russland

Kemur bara eitt russisk skot á NATO-økið, so verður grein 5 sett í verk alt fyri eitt,  ávarar USA. 

Grein 5 sigur, at eitt álop á eitt NATO-land, er eitt álop á øll NATO- lond, sum merkir, at NATO gerst partur av krígnum. 

35 fólk lótu lív í gjár, eftir at Russland sendi rakettir eftir eini ukrainskari herstøð minni enn 25 kilometrar frá markinum til Póllands.

Talan er um størstu herstøð í vestara parti av Ukraina, og støðin verður ofta brúkt til felags venjingar við NATO, sigur Sky News.

Álopið á herstøðina hevur nú ført kríggið longri vestureftir, tætt upp at markinum til Póllands, sum er limur í NATO.