BankNordik: Opið kríggj var millum táverandi nevnd og leiðslu

Høvuðsorsøkin til, at øll nevndin í BankNordik var skift út á seinasta aðalfundi, var ivaleyst, at tað innanhýsis var opið kríggj millum táverandi nevnd og leiðslu.

Tað skrivar Dimmalætting, sum sigur seg byggja upplýsingarnar á eina alítandi keldu. 

Blaðið skrivar, at tað var eitt innanhýsis stríð millum nevndarlimir um ein nú fyrrverandi nevndarformann, ið segði ósatt fyri almenninginum, og stjóran, sum í roynd og veru segði seg úr starvi, men sum eftir formansrumblið seinasta heyst, brádliga tók uppsøgnina aftur. 

Allir nevndarlimirnir skiftir

Eftir øllum at døma hava teir stóru partaeigararnir verið so ónøgdir við stríðið í nevndini, at teir á aðalfundinum í síðstu viku valdu at skifta alla nevndina út. Tað er rættiliga óvanligt, tó at hetta eisini hendi fyri nøkrum árum síðani.

Tað nýggja er, at nú eru tað bara føroyingar, sum manna nevndina. Forkvinna er Birita Sandberg Samuelsen, advokatur.