Sarah Mahfoud skal verja heimsmeistaraheitið

IBF-heimsmeistaraheitið í fjaðurvekt stendur upp á spæl, tá føroyska Sarah Mahfoud fer í ringin ímóti týsku Ninu Meinke í kvøld.

Sarah Mahfoud tryggjaði sær HM-heitið, tá hon vann á argentinsku Brendu Carabajal fyri góðum tveimum árum síðan. 

Bert ein mánað seinni steðgaði heimurin upp av koronu, og ikki fyrrenn nú sleppur Sarah Mahfoud at verja beltið. Dysturin ímóti Ninu Meinke skuldi upprunaliga boksast í januar í ár, men korona steðgaði eisini tí dystinum. 

 - Hon er sterk, og hevur boksað í tyngri vektflokkum. Hon hevur góðan teknikk og er ein dugnaligur boksari. So tað verður ikki ein lættur dystur, men tað er eisini tað, sum ger, at tað verður ein góður dystur, segði Sarah Mahfoud við 3-2 í desember.

Sarah Mahfoud er fegin um endiliga aftur at sleppa aftur í dyst, og gleðist um at skula boksa í Danmark.

 - Tað merkir, at eg fái stuðul í høllini, og tað gevur mær orku og áræði. Eg gleði meg í heila tikið sera nógv at boksa aftur, tí tað er so leingi síðan seinast, sigur Sarah Mahfoud við danishfightnight.com.

 - Allir dystir hava eitt ávíst trýst við sær. Har er ikki ein eitt'ari og ein tvey'ari, men ein vinnari og ein tapari. Missi eg beltið, havi eg ikki somu dystarmøguleikarnar og endi aftast í raðnum, segði Sarah Mahfoud við 3-2. 

Føroyski boksarin, sum hevur røtur í Vestmanna, er eftir 10 dystir framvegis ósigrað, meðan týska mótstøðukvinnan hevur tapt tveir av sínum 12 dystum. 

Sarah Mahfoud

Frítekst tagging: 

Boksing

Sarah Mahfoud

IBF