Føroyar og Ísland samstarva um royndir á flóttafólkaøkinum

26.04.2022 - 15:33
AktueltSamfelag
Føroyar og Ísland samstarva um royndir á flóttafólkaøkinum
Løgmaður og íslendski forsætisráðharrin hittust í Reykjavík í dag
Bárður á Steig Nielsen, løgmaður, hitti Katrína Jakobsdóttir, forsætisráðharra, í Reykjavík í dag.
 

Føroyar og Ísland eru samd um at taka undir við altjóða revsitiltøkunum, sum vesturheimurin hevur sett í verk ímóti Russlandi.

Tað var ein niðurstøða, tá Bárður á Steig Nielsen, løgmaður, hitti íslendska forsætisráðharran, Katrína Jakobsdóttir, í Reykjavík í dag.

Tey viðgjørdu m.a. russisku innrásina í Ukraina, og hvørjar búskaparligu avleiðingar innrásin hevur fyri Føroyar og Ísland.

Bæði Føroyar og Ísland taka ímóti flóttafólkum úr Ukraina. Avrátt varð, at føroyskir og íslendskir myndugleikar í næstum fara undir eina tilgongd, har vitan og royndir á flóttafólkaøkinum koma báðum pørtum til gagns.

 

Styrkja samstarvið

Løgmaður og íslendski forsætisráðharrin eru eisini á einum máli um at styrkja samstarvið millum Føroyar og Ísland, tá ið tað snýr seg um handil, gransking, mentan og útbúgving.

Føroyingar og íslendingar hava nógv í felag, málsliga, mentanarliga, søguliga og sum samfeløg við felags áhugamálum í Norðuratlanshavi. Mongu felags áhugamálini eru haldgott grundarlag undir einum framhaldandi góðum samstarvi, stendur í tíðindaskrivi frá Løgmansstovuni.

- Harðrenda russiska innrásin í Ukraina hevur álvarsamar avleiðingar fyri okkum í Norðuratlantshavi.  Ísland er okkara brøðratjóð, og tí er tað avgerandi, at vit halda á við at styrkja samstarvið og sambandið við Ísland. Við stóru broytingunum úti í heimi í huga, hevur tað stóran týdning, at vit leggja nógv fyri at finna eitt felags stev við allar okkara grannar í Norðuratlantshavi, sigur Bárður á Steig Nielsen, løgmaður.

Er kopiera
Nýggjastu sendingar í ÚV
Leygardag 3. desember
Plátupanelið 003 (Politiskar plátur)
148901
Leygardag 3. desember
Jambalaja 021222
148900
Leygardag 3. desember
Brunsj við Benny Ejdesgaard
148898
Leygardag 3. desember
Upp á tá - 021222
148895
Leygardag 3. desember
Morgunlestur leygardagur 3. desember 2022
148597
Nýggjastu sendingar í SV
Fríggjadag 2. desember
Javnaðarflokkurin í Andglettinum
148751
Fríggjadag 2. desember
Miðflokkurin í Tinginum
148852
Hósdag 1. desember
Fólkaflokkurin í Andglettinum
148527
Hósdag 1. desember
Val kring landið - Hov
148799