Akraberg seldur til Íslands

Eitt felag hjá Samherja í Íslandi hevur keypt Akraberg. Tað upplýsir Anfinn Olsen, reiðari fyri útvarpinum.

Verksmiðjutrolarin úr Fuglafirði fór gjáramorgunin fyri seinastu ferð úr Føroyum.

Skipið er nú á veg til Frederikshavn, har verksmiðjan skal umbyggjast, og síðan skal skipið til Íslands, har nýggju eigararnir yvirtaka skipið.

Arbeiðið er mett at taka umleið 14 dagar. Tað skrivar fiskur.fo.  

Ókendur søluprísur
Hvat Akraberg er seldur fyri er ikki upplýst. 

Nýggi Akraberg, sum Framherji letur byggja á skipasmiðjuni Vard í Norra, verður eftir ætlan yvirtikni 30. juni í ár. Tað sigur Annfinn Olsen.

Prísurin fyri tað skipið er 317 milliónir krónur.

Fyrr í vikuni kom fram, at Framherji hevur skrivað undir sáttmála við skipasmiðju í Skagen um bygging av nýggjum uppisjóvarskipi. 

Vágaportalurin skrivaði, at nýggja uppisjóvarskipið kostar góðar 300 milliónir krónur, og verður klárt, sambært avtaluni í juni 2024.