- Tíðindi, mentan og ítróttur
Grønland setur eisini tiltøk í verk móti Russlandi
Grønlendska landstingið hevur einmælt samtykt at seta tiltøk í verk móti Russlandi, í kjalarvørrinum á krígnum í Ukraina.
Støða er ikki tikin til, hvørji tiltøk skulu setast í verk, men landsstýrið hevur fleiri møguleikar, skrivar grønlendska kringvarpið.
Ein møguleiki er at gevast at selja skeljadýr og fiskavørur til Russlands.
Millum 13 og 14 prosent av øllum útflutningi av skeljadýrum og fiskavørum í fjør fóru til Russlands, og selt var fyri 580 milliónir kr.
Grønlendingar skelja nógv skeljadýr til Russlands. (Mynd: KNR)
Góðtaka støðuna
Grønlendska vinnan góðtekur eisini støðuna, hóast vandi er fyri, at tiltøkini kunnu raka arbeiðspláss í Grønlandi.
Christian Keldsen, formaður í Grønlands Erhverv, væntar, at vinnan fer at laga seg til umstøðurnar. Royal Greenland gavst við øllum handli til Russlandi í mars.
- Grønlands Erhverv hevur alla tíðina tikið undir við, at Grønland skal gera sum hini vestanlondini og seta tiltøk í verk móti Russlandi. Tiltøk hava longu verið í gildi eina tíð, og tað tykist sum fyritøkurnar hava dugað væl at handfara støðuna, sigur Christian Keldsen.
Føroyska lógin komin í gildi
Føroyska lógin um revsitiltøk móti Russlandi kom í gildi í hesi vikuni.
Løgtingið samtykti einmælt lógina, men ikki uppskotið, sum kom úr Uttanríkismálaráðnum. Meirilutin í Uttanlandsnevndini broytti uppskotið.
Tað hevur við sær, at landsstýrismaðurin skal hava heimild frá løgtinginum, um hann ætlar at gera revsitiltøk, sum kunnu ávirka fiskiveiðusamstarvið hjá Føroyum.
Ásett verður í kunngerð, hvørji revsitiltøkini vera. Tann kunngerðin ella tær kunngerðirnar verða nú gjørdar í Uttanríkismálaráðnum.