Alt virksemið hjá Setrinum verður savnað á Frælsinum

23.06.2022 - 08:40
AktueltPolitikkur
Alt virksemið hjá Setrinum verður savnað á Frælsinum
Tórshavnar býráð hevur samtykt prinsippavtalu um makaskifti millum kommununa og Mentamálaráðið
Fróðskaparsetrið skal flyta úr Sjóvinnuhúsinum, sum skal hýsa umsitingini hjá Tórshavnar kommunu.
 

Landið fær ognarpartin hjá kommununi í Venjingarskúlanum, Tórshavnar kommuna fær gamla studentaskúlan í Hoydølum, og Fróðskaparsetrið skal flyta úr Sjóvinnuhúsinum.

Tað er kjarnin í prinsippavtaluni um makaskifti millum kommununa og Mentamálaráðið, sum Tórshavnar býráð samtykti í gjár.

Avtalan loysir bæði hølistrupulleikar hjá landsmyndugleikunum og kommununi, stendur í viðmerkingum til málið. 

 

Ætlanin er at skapa eitt kampus á Frælsinum, har Venjingarskúlin helt til.

 

Miðsavna virksemið á Frælsinum

Við at yvirtaka tey 40 prosentini, sum kommunan eigur av økinum á Frælsinum, fær landið umstøður til at miðsavna virksemið hjá Fróðskaparsetrinum og skapa eitt kampus á Frælsinum. Landið eigur frammanundan hini 60 prosentini. 

Partur av Setrinum heldur í løtuni til í Sjóvinnuhúsinum, men avtalan staðfestir, at Setrið skal flyta út skjótast gjørligt og í seinasti lagi við ársenda 2024. 

Tá ið tað hendir, er ætlanin hjá kommununi at miðsavna alla kommunalu fyrisitingina, sum nú húsast í fleiri bygningum í miðbýnum, undir eina lon í Sjóvinnuhúsinum.

- Við at flyta Fróðskaparsetrið úr leigumálinum í Sjóvinnuhúsinum og út í bygningarnar á Frælsinum og við at flyta fyrisitingina hjá kommununi úr mongu bygningunum í miðbýnum og út í Sjóvinnuhúsið, verða atlit tikin til ynskini hjá bæði Tórshavnar kommunu og Fróðskaparsetrinum.

 

Tórshavnar kommuna fer at yvirtka gamla studentaskúlan í Hoydølum.

 

Yvirtaka studentaskúlan

Harumframt yvirtekur kommunan gamla studentaskúlabygningin í Hoydølum, og gerst leys av einum gávulyfti, ið Tórshavnar býráð í 1990 gav Fróðskaparsetrinum um at lata lendi, sum er umleið 50.000 fermetrar stórt, til nýtt Fróðskaparsetur í Marknagili.

Avtalan er treytað av, at Løgtingið góðkennir avtaluna millum partarnar, og at Løgtingið setir neyðuga peningin av til at umvæla bygningarnar á Frælsinum eftir eini nærri ásettari ætlan.

Málið varð einmælt samtykt á býráðsfundinum í gjárkvøldið.

Er kopiera
Nýggjastu sendingar í ÚV
Týsdag 27. september
Mono - Dávidssálmar (4:5)
145412
Týsdag 27. september
Breddin - Tøkugjald og diabetesmiðstøð
145403
Týsdag 27. september
Góðan morgun Føroyar 27.09.2022
145393
Týsdag 27. september
Morgunlestur týsdagur 27.september 2022
145185
Mánadag 26. september
Við Tórði á túri at reka í Lítlu Dímun
145338
Nýggjastu sendingar í SV
Mánadag 26. september
3-2
145358
Sunnudag 25. september
Sangmøti í Ebenezer.
145276
Sunnudag 25. september
Andakt við Palla Petersen
145275
Mánadag 19. september
3-2
145026
Sunnudag 18. september
Andakt við Karinu Magnussen
144956