Fimm føroyskar reiðkvinnur við til DM

Tað man vera fyrstu ferð, at Føroyar eru so væl umboðaðar til eina DM kapping í gonguløgum, skrivar Ríðisamband Føroya í tíðindaskrivi. Tí í ár kappast heili fimm føroyskar kvinnur um danmarksmeistaraheitið í gonguløgum fyri íslandsross. 

Tað er vanliga sera dýrt at fara uttanlands at kappast, men tær tríggjar Beinta P. Debes, Ragnheiður Ólafsdóttir og Ester Dahl á Heygum valdu at luttaka í sambandi við, at tær eisini skulu luttaka í NM í Álandi í august.

Afturat teimum koma so Rakel Tindskarð og Elin Tindskarð, sum báðar búgva í Danmark.

Sambært Ríðisambandinum telist Danmark millum fremstu tjóðir, tá talan er um slíkar kappingar. Vónirnar eru kortini góðar. 

Elin Tindskarð hevur ofta verið við í oddinum og man eisini fara at vera millum bestu boðini um eitt finalupláss, skrivar Ríðisambandið.

Kappingin byrjar í dag og kann stroymast her.