- Tíðindi, mentan og ítróttur
Nógv fjølbroytt tilfar í Kringvarpinum á ólavsøku
Ólavsøkuaftan
Ólavsøkan í Kringvarpinum byrjar sum vant ólavsøkuaftansmorgun í útvarpinum. Tá senda vit beinleiðis allan fyrrapartin.
Klokkan 14 verður ólavsøkan sett. Tað senda vit beinleiðis í bæði útvarpi og sjónvarpi.
Eftir tað seta vit oman á Vestaru vág til ársins seinasta kappróður. Ólavsøkukappróðurin verður sendur beinleiðis bæði í útvarpi og sjónvarpi. Byrjað verður at senda kl. 15.
Eftir kl. 18 senda vit føroyskan dans í útvarpinum, men frá kl. 21 eigur ungdómurin Studio 4, við beinleiðis sending í góðar tveir tímar.
Ólavsøkuaftan hava vit beinleiðis sending úr býnum í sjónvarpinum frá kl. 18. Vit fáa reportasjur, prát og gott undirhald.
Aftaná ólavsøkusendingina úr býnum, senda vit konsertina "Minnist tú enn" við Tórshavnar Big Band í sjónvarpinum.
Ólavsøkudag
Ólavsøkudag byrjar útvarpið kl. 10 við tíðindum og barnaútvarpi.
Síðani verður guðstænasta, sangur á tinghúsvøllinum og sjálv tingsetanin.
Eftir tíðindini kl. 14 er beinleiðis útvarpssending úr Studio 4, og út á kvøldið fara vit í býin við sendara í sendingini "Omaneftir og niðaneftir Vallaratúni".
Eisini sjónvarpið er við til stóru løturnar á Ólavsøku.
Ólavsøkudag byrja vit kl. 11, tá vit senda guðstænastu úr Dómkirkjuni.
Vit síggja og hoyra vakra sangin undir Tinghúsinum.
Og vit eru eisini við, tá tingið verður sett.
Seinni um dagin vísa vit millum annað tveir dokumentarar, annar er um Andreu Árting og hin um Niels Juul Arge.
Báðar ólavsøkudagarnar fara vit upp á gólv við spildurnýggjum upptøkum úr Sjónleikarhúsinum.
Góða ólavsøku.
Myndirnar hevur Bjarni Árting Rubeksen tikið.