Umhvørvisdeild mælir frá ætlaðari útbygging við Sundsvegin

Nú freistin er farin at koma við hoyringssvarum um ætlaðu broytingina í byggisamtyktina hjá Tórshavnar býráð fyri matrikul nummar 1458a, sum er við Sundsvegin í Havn, so komu níggju hoyringssvar inn - harímillum ein innanhýsis viðmerking frá umhvørvisdeildini hjá Tórshavnar kommunu.

Har sæst, at Umhvørvisdeildin mælir beinleiðis frá ætlaðari útbyggingini við Sundsvegin.

Umhvørvisdeildin vísir á, at økið hevur náttúru-, landslags- og frítíðarvirði og liggur millum skógarfriðað øki og frílendi. Samstundis er stórt útbyggingartrýst á økinum.

Umhvørvisdeildin hjá Tórshavnar kommunu mælir tí til, at kommunan varðveitir verandi byggisamtykt og kannar møguleikan fyri at keypa økið til marknaðarprís fyri at tryggja tað sum eitt grønt og rekreativt øki.

Kann geva pláss fyri 80-85 bústaðum

Galdandi byggisamtykt leggur upp til 18 sethús, men nýggja uppskotið loyvir munandi tættari bygging, millum annað íbúðarbygningum við fleiri búeindum.

Umhvørvisdeildin hjá Tórshavnar kommunu hevur roknað út, at við ætlaða nýtslustiginum kann talan verða um ein samlaðan byggirætt upp á umleið 6.600 fermetrar. Tað kann svara til umleið 80-85 búeindir, alt eftir stødd og innrætting.

Hetta kann eisini skapa tørv á umleið 84 parkeringsplássum. Sambært útrokningini kunnu tey leggja hald á umleið 1.680 fermetrar, svarandi til 15 prosent av samlaða økinum. Deildin ávarar, at hetta kann ganga út yvir felagsøki, fríøki og grøn øki.

Vil hava eina heildarætlan

Umhvørvisdeildin hjá Tórshavnar kommunu heldur eisini, at størri atlit eiga at takast at skógarfriðaða økinum, frílendinum, náttúrligum vatnviðurskiftum og samanhangandi grønum økjum. Eisini eigur at sleppast undan, at lendið verður óneyðuga javnað, fylt út ella broytt.

Niðurstøðan er tí, at galdandi byggisamtykt eigur at verða varðveitt óbroytt. Verður kortini farið víðari við nýggju ætlanini, so mælir Umhvørvisdeildin millum annað til, at byggitættleiki, parkering, grøn øki og samlaða ávirkanin á nærumhvørvið verða munandi betur lýst og regulerað, sæst at lesa í hoyringssvarinum um ætlaðu broytingina í byggisamtyktina hjá Tórshavnar býráð fyri matrikul nummar 1458a, sum er við Sundsvegin í Havn.