"Plantur til matna" komin út sum pappírsbók

"Tørvur var á at savna vitan um at grógva grønmeti í Føroyum, tí kunnleikin var spjaddur og í ov lítlan mun niðurskrivaður". Tað sigur Sigga Rasmussen, cand.hort, sum hevur skrivað bókina "Plantur til matna", ið kom út sum sbók í 2024.

Bókin var eitt úrslit av eini verkætlan, sum Sigga tók stig til á vári 2022 í samstarvi við Búnaðarstovuna og NÁM, og nú er hon komin út í pappírsútgávu, so fólk eisini kunnu hava hana liggjandi frammi. Sigga viðmælir tó eisini at nýta sbókina, tí har eru fleiri leinkjur til upplýsingar um plantur, dyrking og vøkstur.

Sigga Rasmussen hevur arbeitt í nógv ár við plantum millum annað sum námslektari í planutfrøði á Setrinum. Hon hevur eisini gjørt sendingar og skrivað greinar um urtagarðar, vøkstur  og dyrking, men sá ein tørv á, at vitanin um at dyrka grønmeti í Føroyum var savnað. Tí liggur eitt stórt granskingar- og savningararbeiði aftanfyri bókina:

- Í arbeiðnum at skriva "Plantur til matna" havi eg tosað við gartnarar, bóndur og onnur, ið hava royndir við at dyrka grønmeti í Føroyum. Eisini havi eg savnað greinar og annað skrivligt tilfar um evnið, eins og bókin er grundað á mínar egnu royndir, sigur Sigga Rasmussen.

"Plantur til matna" er tøk sum sbók á heimasíðuni: https://planturtilmatna.sbok.nam.fo/

Lurta eftir samrøðuni við Siggu, sum var í sendingini Summarmorgun her: