Sóknast eftir vitnum

Politiið sóknast eftir vitnum til harðskap á ólavsøku, tí um hálvgum trý-tíðina í nátt fekk politiið boð um bardaga uttan fyri Auto.

Har var ein og sami maður lagstur á trý fólk og hevði sligið tey, men hann varð handtikin á staðnum.

Stutt eftir hetta kom fráboðan um, at eini 20 minuttir frammanundan varð ein maður sligin í andlitið uttan fyri Kaffihúsið í Vágsbotni.

Tað vísti seg at vera sami maður, sum varð handtikin uttan fyri Auto.

Politiið kennir tó ikki navni á tí, ið var sligin, so tí sóknast politiið eftir vitnum, ið hava sæð tilburðin uttan fyri Kaffihúsið.

Maðurin, sum varð handtikin fyri at sláa, verður avhoyrdur í dag. 

Harafturat fekk politiið boð um bardaga í Tórsgøtu í býnum klokkan trý korter til fimm í morgun, har tríggir mans og ein kvinna bardust.

Sum skilst, var eitt par komið til ilnar, og síðani høvdu tveir mans lagt uppí og høvdu lagt á mannin.

Eitt vitni tók nakað av tilburðinum upp á video, men politiið vil kortini fegin frætta frá fólki, sum hevur sæð nakað.