Eikmálið: Dómsviðgerðin byrjar í morgin

Dómsviðgerðin, proseduran, í Eikmálinum byrjar í morgin í Eystari landsrætti.

Fyrst hava teir tríggir advokatarnir hjá Eikmonnunum orðið.Teir vera lidnir fríggjadagin.

Týsdagin í næstu viku fær advokaturin hjá Fíggjarligum støðufesti orðið.

Dómsviðgerðin endar hósdagin í næstu viku, tá málið verður tikið upp til dóms. 

Í dómsviðgerðini nevna advokatarnir alt tað, sum sambært teimum eigur at geva teimum viðhald.

Byrjaði í landsrættinum 26. apríl

Eystari landsrættur fór undir Eikmálið 26.apríl.

Teir tríggir Eikmenninir, Marner Jacobsen, sum var forstjóri, Frithleif Olsen, ið var nevndarformaður, og Odd Bjellvåg, sum var næstformaður í Eik, vórðu í Føroya rætti 18.november 2019 dømdir at rinda tilsamans 150 milliónir krónur í endurgjaldi til Fíggjarligt støðufesti í sambandi við, at Eik banki kollsigldi. 

Teir kærdu dómin til Landsrættin.

Krevja frídøming

Í Landsrættinum krevja teir frídøming, ella, í øðrum lagi, at skula gjalda minni enn 150 milliónir krónur.

Fíggjarligt støðufesti krevur, at dómurin hjá Føroya rætti verður staðfestur.

Ingi Højgaard er sakførari hjá Frithleivi Olsen, Christian Andreasen hjá Odd Bjellvåg og Søren Lundsgaard hjá Marneri Jacobsen.

Claus Juel Hansen er sakførari hjá Fíggjarligum støðufesti.