Spreingingar elvdu til skaðan á Nord Stream

Ógvisligar spreingingar vóru atvoldin til, at Nord Stream 1 og 2-gassleiðingarnar fóru at leka.

Tað skrivar danska løgreglan í einum tíðindaskrivi fyrrapartin.

Í tíðindaskrivinum ljóðar, at PET, fregnartænastan hjá donsku løgregluni, og løgreglan í Keypmannahavn samstarva, til tess at koma nærri einari niðurstøðu í málinum um gasslekarnar í Eystrasalti.

Myndugleikarnir hava annars verið kvirrir, men fleiri kanningar eru longu gjørdar eftir spreingingarnar.

Umfatandi skaði

»Kanningarnar vátta, at umfatandi skaðar eru á Nord Stream 1 og 2, og at orsøkin er ógvisligar spreingingar«, stendur millum annað í skrivligu fráboðanini.

26. september í ár varð ein leki á Nord Stream 1 staðfestur. Stutt eftir ljóðaði, at Nord Stream 2-gassleiðingin eisini var rakt.

Tað varð skjótt greitt, at fleiri spreingingar høvdu verið. Og tað eru hesar upplýsingarnar, sum løgreglan nú alment váttar í einum tíðindaskrivi.

Nord Stream gassleki, leki á Nord Stream-gassleiðing

Herverk

Danmark hevur, saman við fleiri londum, eisini sagt, at talan var um herverk. Londini hava tó einki sagt um, hvør tey halda framdi spreingingarnar.

Danska løgreglan vil ikki fara í smálutir um, hvussu altjóða løgreglusamstarvið verður skipað.

Løgreglan vil heldur ikki fortelja miðlunum meira enn tað, ið stendur í tíðindaskrivinum, sum varð sent út fyrrapartin.