Lítil javnstøða á uppstillingarlistunum

Tað er framvegis nakað eftir á mál, áðrenn javnstøða er á uppstillingarlistunum til fólkatingsvalið.

Tilsamans 60 fólk í Føroyum stilla upp til valið um 10 dagar; 36 menn og 24 kvinnur.

Hetta svarar til, at 60 prosent av teimum uppstillaðu í Føroyum eru menn, og 40 prosent eru kvinnur.

Støðan tann sama í 2019

Men, tað er ikki so nógv nýtt í hesum í so máta, tí á fólkatingsvalinum 2019 var prosentbýtið umleið tað sama.

Tá stillaðu 63 fólk upp, og prosentbýtið var 59 prosent menn og 41 prosent kvinnur.

Tilsamans 37.387 fólk í Føroyum hava valrætt til fólkatingsvalið, sum í Føroyum verður mánadagin 31. oktober.