Føroyar líkjast USA, tá tað snýr seg um álit á tíðindamiðlum

Um KVFBloggur
Føroyar líkjast USA, tá tað snýr seg um álit á tíðindamiðlum
Álitið á tíðindamiðlum og myndugleikum sum heild er sera stórt í okkara grannalondum. Føroyar víkja nógv frá, sigur Heini í Skorini, miðlagranskari
Mynd: Bjarni Árting Rubeksen  
 
10/24/2022 - 15:05

Sum áður staðfest á miðlaráðstevnuni ‘Miðlar á vegamóti’, sum var hildin í august, er stórt álit nakað, sum eyðkennir Norðurlond. Setrið fór í fjør undir at kanna, í hvønn mun Føroyar hava henda sama eginleikan.

800 fólk luttóku í stóru miðlakanningini, sum Setrið gjørdi í samstarvi við greiningarstovnin Lóður.

Tá ið spurt varð:

Eg haldi, at mann kann hava álit á teimum flestu tíðindamiðlunum tað mesta av tíðini”, sá úrslitið fyri Føroyar soleiðis út:

Úr framløguni hjá Heina í Skorini á miðlaráðstevnuni 'Miðlar á vegamóti'. 


Heini í Skorini leggur dent á, at mann ikki skal gera ov drastiskar niðurstøður út frá einstøkum kanningum, men út frá hesum er álitið á miðlum í Føroyum nógv minni enn í okkara grannalondum. Í roynd og veru líkjast vit USA, sum er eitt tað mest polariseraða landið í Vesturheiminum. Hetta er ørkymlandi, um mann sigur, at álit sum útgangsstøði er gott, sigur Heini í Skorini.

Tá ið tað hinvegin verður spurt:

Eg haldi, at mann kann hava álit á teimum flestu tíðindamiðlunum, sum eg brúki, tað mesta av tíðini”, sær øðrvísi út. Her byrja Føroyar at líkjast meira grannalondunum, har 54% av teimum spurdu eru púra samd ella partvíst samd í útsøgnini. Álitið er tó framvegis lægst í Føroyum í mun til hini Norðurlondini:

Úr framløguni hjá Heina í Skorini á miðlaráðstevnuni 'Miðlar á vegamóti'. 


Í Norra, Svøríki, Finnlandi og Danmark er munurin millum álitið á tíðindamiðlum sum heild og tíðindamiðlum, “sum eg brúki”, lítil, nøkur fá prosentstig. Tað gevur ábendingar um breitt álit á bæði borgarligu pressuna og á sosialdemokratisku pressuna. Í Føroyum er munurin nógv størri – nærum 20%. Hetta er ein ábending um, at vit ikki líkjast okkara grannalondum og um, at polarisering og ósemjur gera seg galdandi. Hetta er áhugavert í einum mikrosamfelagi, har 10 minuttir eru at koyra úr Havnini inn í Eysturoynna, heldur Heini í Skorini.


Føroyingar hava størst álit á Kringvarpinum

Tá ið tað verður spurt meira neyvt um teir einstøku føroysku tíðindamiðlarnar, vísir tað seg, at føroyingar hava størst álit á landsins public service-miðli, Kringvarpinum. Hetta er ein tendensur, sum er gjøgnumgangandi fyri Norðurlond. Her svaraðu 76%, at tey høvdu antin stórt ella nokk so stórt álit á Kringvarpinum.

Føroyingar hava minst álit á Youtube og Facebook – ávikavist 8 og 6%:

Úr framløguni hjá Heina í Skorini á miðlaráðstevnuni 'Miðlar á vegamóti'. 


Kanningin hyggur eisini at samanhanginum millum álit á miðlum og nýtsluna av teimum. Álit og nýtsla fylgjast nevniliga ikki altíð og heldur ikki í Føroyum, tí teir miðlarnir, sum vit hava minst álit á – Facebook og Youtube – brúka vit allarmest:

20220818_Midlaradstevna_Heini_i_Skorini_brot_1

Politisk sannføring, kyn og útbúgving eru avgerandi fyri álitið á miðlum

Hvør hevur so ikki álit á tíðindamiðlunum, verður spurt í kanningini. Úrslitini fyri Føroyar líkjast í hesum føri teimum í grannalondunum.

Nógvir faktorar gera seg galdandi, m.a. geografi, hvar er mann á høgra/vinstra-stiganum, men teir faktorarnir, sum hava mest at siga, eru politisk sannføring, kyn og útbúgving:

Tendensurin er tann, at um tú atkvøðir fyri einum flokki, sum í dag situr í stjórn, so hevur tú í miðal minni álit á Kringvarpinum. Menn hava størri misálit enn kvinnur, og fólk við lægri ella miðallongum útbúgvingum hava minni álit enn fólk við hægri útbúgving”, greiðir Heini í Skorini frá.

Úr framløguni hjá Heina í Skorini á miðlaráðstevnuni 'Miðlar á vegamóti'. 


Lurta eftir framløguni hjá Heina í Skorini niðanfyri. Meira tilfar frá miðlaráðstevnuni Miðlar á vegamóti er at finna her. 

20220818_Midlaradstevna_Heini_i_Skorini

 

Nýggjastu sendingar í ÚV
Hósdag 28. mars
Ein sangur til dirvi
172633
Hósdag 28. mars
Lesikrókurin: Staklutirnir
172944
Hósdag 28. mars
Úr Koltri til Kirkjubøar (1:2)
172479
Nýggjastu sendingar í SV
Hósdag 28. mars
Skírishósdagur: Tummas Kannuberg
172799
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Mikudag 27. mars
Frætt og fregnað 1 (1:3)
40584
Mikudag 27. mars
Frætt og fregnað 1 (2:3)
40585

Um kvf css