Gongd komin á koppsetingina

Gongd er nú komin á koronukoppsetingina við fjórða prikinum, sum eisini verður nevnt stimburprikið.

Tað sigur Fróði Jacobsen, samskiftisfólk á Landssjúkrahúsinum. 

Sambært nýggjastu tølunum frá Landssjúkrahúsinum hava 3121 fólk fingið stimpurprikið.

Koppsetingarbólkurin var annars - eftir ein fund mikudagin í síðstu viku - samdur um, at tað gekk alt ov seint at fáa fólk koppsett.  

Færri enn væntað

Koppsetingarbólkurin heitti tí á Heilsumálaráðið, um at senda eitt skriv út til leiðslurnar á ellisheimunum kring landið at bera so í bandi, at øll búfólk fáa tilboð um koppseting fyri hálvan november. 

Lars Fodgaard Møller, landslækni, heitti eisini hósdagin í síðstu viku á tey í aldursbólkinum 50 ár og eldri um at lata seg koppseta. Hann segði tá, at einans 2.000 fólk høvdu latið seg koppsett, og at tað vóru nógv færri enn væntað.

- Aldur hevur nógv at siga í hesum føri, og tey á ellis- og røktarheimum hava ein aldur, har tey eru í vanda fyri at gerast álvarsliga sjúk, um tey verða smittað við koronu, segði hann við útvarpið. 

445 koppsett í ein dag

Men nú er líkt til, at gongd er komin á koppsetingarnar. Nevnast kann, at mikudagin 26. oktober vórðu 445 fólk koppsett kring landið. Hetta er tað mesta ein einstakan dag síðani 8. januar.

Í løtuni er eingin innlagdur við koronu.