Lata síðsta skotið av í Árnafjarðartunlinum týsdagin

Týsdagin verður síðsta skotið í Árnafjarðartunlinum, sum er annar av tunlunum norður um Fjall, latið av.

Knút Guðjónsson skjýtur síðsta skotið í Ánunum klokkan 14. Hann var ein av trimum formonnum, tá gamli tunnilin norður um Fjall var gjørdur. 

Knút Guðjónsson var eisini við til at gera Hvannasundstunnilin, Sandvíkartunnilin og gamla Hvalbiartunnilin. 

Hátíðarhald á kaiøkinum

Hátíðarhaldið verður á kaiøkinum í Ánunum.

Sigurd L. Lamhauge, stjóri í Landsverki, Uni Rasmussen, landsstýrismaður í samferðslumálum, og Karl Johansen, borgarstjóri í Klaksvíkar kommunu, halda røðu. 

Árnafjarðartunnilin er umleið 1900 metrar langur, og Hvannasundstunnilin umleið 2200 metrar. Samlað vegalongd, har tunnlar og vegir eru roknaðir við, er umleið 6. 500 metrar.

Tunlarnir fara at kosta 522 mió. kr., og teir verða væntandi lidnir á heysti í 2024.