Iran hevur selt Russlandi dronur

Tað er iranski uttanríkisráðharrin Hossein Amir-Abdollahian, sum boðar frá søluni eftir at landið í fleiri mánaðir hevur verið ógreitt í sínum orðinum um iransku dronurnar, sum Russland nýtir móti ukrainska undirstøðukervinum.

- Vit sendu eitt avmarkað tal av dronum til Russlands fleiri mánaðir undan krígnum í Ukraina, segði hann við journalistar í Teheran í dag.

Higartil hava iranskir tænastumenn víst aftur, at Iran hevur givið Russlandi vápn. So seint sum í hesi vikuni segði iranski ST-sendiharrin, at einki hald er í skuldsetingunum, og hann endurtók, at Iran er uttanveltað í krígnum.