Vunnu og taptu

Føroysku hondbóltskvinnurnar vunnu seinna dystin ímóti Kosovo, men megnaðu allíkavæl ikki at spæla seg víðari til næsta umfar í HM-undankappingini.

Í gjár vunnu Føroyar 29-28, eftir at tað hevði staðið á jøvnum í hálvleikinum, men tað var ikki nóg mikið til at bøta um samlaðu støðuna, tí Kosovo vann 29-26 í fyrra dystinum, sum var hóskvøldið.

Føroyar høvdu í gjárkvøldið møguleika at vinna við teimum kravdu trimum málunum, og kvinnurnar vóru bæði í fyrra og seinna hálvleiki á odda við júst trimum málum, men kláraðu ikki at halda tørn.

Tá ið ein minuttur var eftir, komu Føroyar upp á 29-27 og fingu vart so frægt, at enn ein møguleiki fekst at koma upp á 30-27, men í staðin varð bólturin søplaður burtur, og Kosovo kundi fáa síðsta málið í dystinum.

Veddingarfyritøkurnar høvdu Føroyar sum favoritt bæði hóskvøldið og í gjárkvøldið, men tann leiklutin megnaði liðið ikki at liva upp til, og tað skyldaðist fyrst og fremst, at verjuspælið ongantíð bleiv nóg gott.

Bestu føroysku málskjúttar í gjárkvøldið vóru Marianna Geirsdóttir Eystberg og Jana Mittún við seks málum í part.