Bíðaði eftir svari frá Landsverki í 10 mánaðir

Landsverk hevur fingið eina átalu frá Løgtingsins umboðsmanni.

Orsøkin er sein málsviðgerð.

Landsverk svaraði ikki einum fyrispurningi um at keypa eina fastogn frá stovninum fyrr enn 10 mánaðir vóru farnir.

Fyrispurningurin var sendur 13.desember í fjør.

Tá Landsverk ikki svaraði, var áminning send 11.august.

Ikki fyrr enn 10.oktober svaraði Landsverk. Tá var longu kært til Løgtingins umboðsmann.

Næstan 10 mánaðir

Landsverk sigur við umboðsmannin, at orsøkin til drúgvu málsviðgerðartíðina, næstan 10 mánaðir, var, at deildin hjá Landsverki, sum viðgjørdi fyrispurningin, hevði eina stóra arbeiðsbyrðu og trot á arbeiðsmegi.

Tað er í lagi, sigur Løgtingsins umboðsmaður.

Men Landsverk átti at hava sagt tí, sum átti fyrispurningin, frá hesum, og nær Landsverk væntaði at avgreiða málið. Og umboðsmaðurin heldur tað vera átaluvert, at Landsverk ikki gav hesa kunning.

Landsverk vísti ikki á nakra sakliga ella umberandi orsøk til, at málsviðgerðin gjørdist so drúgv, sigur Løgtingsins umboðsmaður.