Turkaland ávarar ferðafólk

Millum annað verður nevnt í ávaringini, at í Europa kunnu turkar rokna við at møta “vantandi átrúnaðarligum tolsemi og hatri”.

AFP-tíðindastovan sigur talan vera um eitt turkiskt aftursvar, eftir at Svøríki, Norra, Danmark og fleiri onnur lond í vesturheiminum hava hert síni tilmæli, tá ið fólk haðani skulu ferðast til Turkalands.

Diplomatisku sambondini millum Turkaland og lond í vesturheiminum eru versnað, eftir at Turkaland fyribils hevur víst aftur at góðkenna Svøríki og Finnland sum nýggjar limir í vesturlendsku verjusamgonguni, NATO.

Finski uttanríkisráðharrin, Pekka Haavisto, sigur nú, at næsti møguleikin hjá Finnlandi og Svøríki at fara upp í NATO kann verða eftir turkiska valið og áðrenn toppfundin í NATO, sum verður í juli mánaði.