Nú verður skiparin á Vesturbúgvanum ákærdur

Seinni í mánaðinum verður ákæra væntandi reist móti skiparanum á Vesturbúgvanum í sambandi við hendingina, tá ið Vesturbúgvin rendi á Eysturbúgvan á summarmála í fjør, og Eysturbúgvin sakk.

Tað upplýsir Katrin Thorsvig Hansen, høvuðsákæri. 

Ákæruvaldið arbeiðir enn við at gera ymiskt kanningararbeiði í málinum. 

Í august í fjør mælti Sjóvinnustýrið ákæruvaldinum til at ákæra skiparin á Vesturbúgvanum fyri brot á millum annað vaktarhaldskunngerðina, tá ið Vesturbúgvin rendi á Eysturbúgvan.

Katrin Thorsvig Hansen

Katrin Thorsvig Hansen er høvuðsákæri.

Skiparin sovnaði

Niðurstøðan hjá donsku skaðanevndini, Den Maritime Havarikommission, sum kannaði óhappið tíðliga um morgunin 14. apríl, var, at skiparin á Vesturbúgvanum sovnaði, tá ið skip hansara var á samanstoytskós og rendi á Eysturbúgvan.

At skiparin svav, er tað sama, sum at eingin var á brúnni.

Hann hevði sovið ov lítið undanfarnu dagarnar, tá ið Vesturbúgvin var á skipasmiðju, tí tøkniligir trupulleikar vóru.

Ávaringin á brúnni, sum skal siga frá í tílíkum førum, var ikki tendrað.

Eysturbúgvin og Vesturbúgvin og samanstoytur

Vesturbúgvin og Eysturbúgvin partrolaðu, tá Vesturbúgvin rendi á Eysturbúgvan, sum sakk. 

Allir vóru bjargaðir

Óhappið hendi, tá ið skipini, sum partrolaðu, skuldu knýta bæði skipini í trolið.

Allir sjey menninir á Eysturbúgvanum vóru bjargaðir umborð á Vesturbúgvan.

Vesturbúgvin hevur ikki fiskað síðani óhappið. Nú verður eitt spæl sett í skipið afturat, so at hann eisini kann fiska einsamallur.