USA fær arktiskan sendimann

Fyri fyrstu ferð skal USA hava arktiskan sendiharra, og nú hevur forsetin, Joe Biden, funnið mannin, sum skal røkja nýggja starvið.

Talan er um granskaran, Michael Sfraga, úr Alaska.

Sfraga er í løtuni formaður í eini amerikanskari granskingarnevnd í Arktis. Hann hevur sjálvur granskað nógv í økinum og hevur stóran kunnleika til arktiska landafrøði og politikk, skrivar miðilin, Alaska Beacon.

Tað var í august í fjør, at boð komu úr Hvítu Húsunum um, at ein arktiskur sendiharri skuldi setast.

Amerikanska kongressin skal góðkenna Michael Sfraga, áðrenn hann kann taka við starvinum sum arktiskur sendimaður.