Býráðið samtykt at broyta byggisamtyktina

Tvøroyar býráð hevur samtykt at broyta byggisamtyktina, so Varðin Pelagic kann byggja út.

Talan er um at víðka havnarøki D 100 metrar eystureftir og broyta neystaøki G, sum er innan fyri havnarøki D, til havnarøki.

Í broyttu byggisamtyktini stendur framvegis, at byggjast má ikki hægri enn 11,5 metrar.

Men so er komið aftrat, at neyðugir tekniskir húsalutir, herundir siloir og skorsteinar, kunnu vera hægri eftir nærri góðkenning býráðsins. 

Súsanna Bertholdsen mælti til, at býráðið fyrst skuldi hava fund við bólkin "livilig kor á Tvøroyri", áðrenn støða var tikin til at broyta byggisamtyktina. 

Bólkurin hevur biðið um fund við býráðið.

Uppskotið hjá Súsonnu Bertholdsen fekk bara eina atkvøðu, hennara egnu.

Súsanna Bertholdsen

Súsanna Bertholdsen mælti til, at býráðið fyrst skuldi hava fund við bólkin "livilig kor á Tvøroyri", áðrenn støða var tikin til at broyta byggisamtyktina. (Mynd: Bjarni Árting Rubeksen)

Atkvøddi blankt

Sjálv atkvøddi hon blankt, tá atkvøtt var um uppskotið um at broyta bygisamtyktina.

Øll hini í býráðnum atkvøddu fyri.

Uppskotið um broyttu byggisamtyktina skal nú liggja frammi alment í minsta lagi í tríggjar vikur, so fólk kunnu mótmæla ella koma við broytingaruppskotum í seinasta lagi seks vikur eftir framløguna.

Mótmæli og broytingaruppskot, sum kommunan sjálv ikki tekur við, skulu vera við uppskotinum, tá tað verður sent landsstýrinum, har býarskipanarnevnd landsins skal viðgera tað.

Landsstýrismaðurin í kommunumálum skal góðkenna broytingina.