Grannauppgerð í steypafinaluni

Tað verður grannauppgerð í steypafinaluni í hondbólti við kvinnum.

Bæði Kyndil og Neistin vóru sannførandi, tá tey vunnu tryggar sigrar á ávíkavist VÍF og H71 í seinnu hálvfinalunum í dag.

Smurdi H71 av

Neistin vann fyrru hálvfinaluna á H71 við trimum málum, og tí var spenningur í Hoyvík í dag.

Hann helt sær kortini ikki leingi, tí Neistin snøgt sagt smurdi hoyvíkingar av. Í hálvleikinum vóru tær bláu á odda heili 18-9, og tann leiðslan kom ongantíð í vanda.

Maria Pálsdóttir Nólsoy var stóri spælarin hjá útiliðnum við níggju málum.

Kyndil basti VÍF

Kyndil hevði eisini eina leiðslu frá fyrra dystinum, tá VÍF vitjaði í høllini á Hálsi í dag.

Heimaliðið kom væl frá byrjan, og tí var ongantíð veruligur spenningur um finaluplássið. 

Turið Arge Samuelsen skeyt heili 12 mál í dystinum, sum endaði 31-26.

Hetta er fyrsta ferðin síðan 2017, at tey bæði havnarliðini skulu spæla steypafinalu ímóti hvørjum øðrum. Ta ferðina vann Kyndil 26-21.