- Tíðindi, mentan og ítróttur
Hægstirættur viðger mál um gjald fyri kvotur
![](https://kvf.fo/sites/default/files/styles/grein-ovasta-mynd/public/haegstiraettur.png?itok=z17_kNiK)
Í dag viðger Hægstirættur málið millum Reiðarafelagið og Fiskivinnu- og samferðslumálaráðið, sum ráðið eitur nú.
Reiðarafelagið vann í Føroya rætti, men landsstýrið vann í Landsrættinum.
Reiðarafelagið fekk loyvi at fara í Hægstarætt við málinum.
Tað var í lagi, tá landsstýrið í 2016 avgjørdi, at manningarnar ikki skuldu gjalda sín part av kvotunum, tá talan var um royndaruppboðssølur í 2016, segði Landsrætturin.
Eystari Landsrættur broytti í september 2022 dómin hjá Føroya Rætti, sum í januar í 2021 segði, at Fiskimálaráðið gjørdi seg inn á sáttmálan millum manningarfeløgini og reiðararnar, tá landsstýrið við lóg avgjørdi, at manningarnar ikki skuldu eiga lut í kostnaðinum.
Krevja 18 mió. í endurgjaldi
Endurgjaldskravið hjá Reiðarafelagnum er slakar 18 mió.kr., men tað er bara fyri 2016.
Kravið fyri 2017 verður ikki kunngjørt enn.
Endurgjaldskrøvini eru parkerað fyri fyrst, sigur Stefan í Skorini, stjóri í Reiðarafelagnum.
Fyrst skal Hægstirættur staðfesta, um landsstýrið hevur endurgjaldsskyldu.
Reiðarafelagið vil hava Hægstarætt at gera lógina um uppboðssølu ógilduga.
Kjarnin í málinum er um brot á evropeiska mannarættindasáttmálan um felagsfrælsi.
Reiðarafelagið var í Eystari landsrætti dømt at gjalda Fiskimálaráðnum 750.000 kr. í sakarkostnaði.