Óli Mittún dagsins maður í Sävehof-sigri

Óli Mittún spældi ein branddyst og varð eisini kosin dagsins maður, tá IK Sävehof vann á Nexe í síðsta umfari av Evropa League-miðumfarinum.

Blaðungi føroyingurin skeyt ikki færri enn 11 mál í 34-28 sigrinum í Partille, og tað merkti, at Sävehof yvirhálaði kroatarnar í endaði á 2. plássi í bólkinum.

 - Tað riggar ofta væl hjá mær ímóti stórum spælarum, sum kanska ikki eru so skjótir, men vit spæla sum heild gott álopsspæl í dag, segði Óli Mittún við IK Sävehof-miðlafólkið eftir dystin.

Tíverri fyri Óla Mittún og teir, vann Skjern sín dyst, og tryggjaði sær 1. plássið og beinleiðis atgongd til fjórðingsfinalurnar, meðan Sävehof og Nexe skulu spæla playoff.

Hákun og Jóhan vunnu báðir

Füchse Berlin er Hákun West av Teigum skulu eisini spæla playoff. Tað var greitt longu áðrenn dystin ímóti Constanta í dag.

Týska høvuðsstaðarfelagið fekk eina vánaliga byrjan upp á dystin í Max-Schmeling-Halle, men við hjálp frá millum annað Hákuni West av Teigum, sum skeyt fimm mál upp á sjey royndir, yvirhálaðu berlinrevarnir eftir steðgin og vunnu til endans trygt. Sporting vann báðar dystirnar ímóti Füchse Berlin, og fór avstað við bólkasigrinum.

Jóhan á Plógv Hansen og Flensburg-Handewitt vunnu eisini sín bólk. Føroyingurin skeyt eitt mál í sannførandi 45-26 sigrinum hjá norðurtýskarunum á Bjerringbro-Silkeborg, og Flensburg-Handewitt er í fjórðingsfinalunum.